Kezdesý barysynda ekijaqty qarym-qatynas pen birlesken jobalardy iske asyrý barysy talqylandy. Atap aıtqanda, Ámirlik kásipkerleri Shymkentten qant zaýytyn salýǵa usynys bildirip otyr. Sonymen qatar ońtústikten turaqty túrde tiri qoı satyp alýǵa nıetti. Qos tarap kezdesýde «Shymkent – Shardja - Shymkent» baǵytynda áýe reıisin ashý jaıyn da talqylady.
«Búginde eki el arasyndaǵy ınvestısııalyq tartymdylyq joǵary deńgeıde. Osyny eskere otyryp, Birikken Arab Ámirlikteri Ońtústik Qazaqstan oblysynan qant zaýytyn salý jónindegi usynysy óz kúshinde ekenin aıta ketkim keledi. Sondaı-aq arab eli ózge de salalarda qarym-qatynasty nyǵaıtýdy josparlap otyr», - dedi ókiletti elshi.
Janseıit Qanseıituly óz kezeginde Birikken Arab Ámirlikteri tarapynan jasalǵan ınvestısııalyq usynystardy tolyǵymen qoldaıtynyn jetkizdi. О́ńir basshysy BAÁ-niń iri saýda ortalyqtarynan ońtústik ónimderin satatyn bólimder ashý máselesin de qozǵady.
«Ońtústik Qazaqstan oblysy ákimdigi men Birikken Arab Ámirlikteri arasyndaǵy baılanys budan ári nyǵaıa beredi degen senim mol. Bul rette birlese qolǵa alynyp otyrǵan jobalardy neǵurlym qysqa merzimde iske asyrý mańyzdy»,- dedi oblys ákimi Janseıit Túımebaev.
Kezdesý sońynda elshi Ońtústik Qazaqstan oblysy men Shardja arasynda baýyrlastyq-yntymaqtastyq qarym-qatynas ornatýdy maqsatynda ońtústik delegasııasyn qonaqqa shaqyrdy.
Aıta keteıik, Shardja – BAÁ-niń mádenı astanasy sanalady. Aýmaǵy 2600 sharshy shaqyrymdy quraıdy. Halqy shamamen 464 myń. Shardja barlyq soltústik ámirlikterdiń áleýmettik-ekonomıkalyq damýynda basty róldi atqarady.
